Bakı-Quba yolunda avtobus yük maşını ilə toqquşdu - FOTO - YENİLƏNİB

Daxili İşlər Nazirliyinin (DİN) Baş Dövlət Yol Polisi İdarəsi (BDYPİ) Bakı-Quba yolundakı yol-nəqliyyat hadisəsi barədə məlumat yayıb.

İdarədən oxu.az-a verilən məlumatda bildirilib ki, sentyabrın 6-da saat 7 radələrində Bakı-Quba avtomobil yolunun 28-ci kilometrində yol-nəqliyyat hadisəsi baş verib.

Belə ki, Bayram Qurbanovun idarə etdiyi "Mercedes-Benz" markalı, 77-NQ-154 dövlət qeydiyyat nişanlı yük avtomobili ilə İlham Vəliyevin idarə etdiyi KIA markalı, 50-AE-425 dövlət qeydiyyat nişanlı sərnişin avtobusu toqquşub.

Qəza nəticəsində avtobusda olan iki sərnişin yüngül xəsarət alıb. Ölüm və ağır xəsarət faktı qeydə alınmayıb.

İlkin ehtimala görə, hadisəyə səbəb yük avtomobilinin təkərlərindən birinin partlaması olub.

Faktla bağlı araşdırma aparılır.

***09:32
Bakı-Quba avtomobil yolunun Sumqayıt şəhərindən keçən hissəsində ağır yol-nəqliyyat hadisəsi baş verib.

Avtosfer.az "Report”a istinadən xəbər verir ki, sözügedən ərazidə sərnişin avtobusu ilə yük maşını toqquşub.

İlkin ehtimallara görə, hadisəyə səbəb yük maşınının təkərinin partlaması olub.

Hadisə nəticəsində yaralıların olduğu bildirilsə də, onların dəqiq sayı və vəziyyətləri barədə məlumat verilməyib.