Bakıda qəza: Əvvəl avtomobilləri əzdi, sonra yaşıllıq əraziyə çırpıldı - VİDEO

Bakıda zəncirvari yol-nəqliyyat hadisəsi baş verib.

Avtosfer.az xəbər verir ki, hadisənin videogörüntüsü sosial şəbəkələrdə paylaşılıb.

Görüntülərdə nəqliyyat vasitəsinin yol kənarındakı yaşıllıq əraziyə çırpılması görünür.

Bakı Şəhər Dövlət Yol Polisi İdarəsinin bölmə rəisi Toğrul Nəsirli Oxu.Az-ın hadisə ilə bağlı sorğusuna cavab olaraq bildirib ki, qəza ötən gün saat 15:00-da qeydə alınıb:

"Dünən günorta saatlarında paytaxtın Yasamal rayonu, Abdulla Şaiq küçəsi ilə Füzuli küçəsinin kəsişməsində zəncirvari yol-nəqliyyat hadisəsi baş verib. "Hyundai" markalı avtomobil idarəetmədən çıxaraq öncə hərəkət zolağındakı "Toyota", daha sonra isə "Mercedes-Benz" markalı nəqliyyat vasitələrinə çırpılıb.

Hadisə nəticəsində ölüm faktı qeydə alınmayıb. "Hyundai" və "Mercedes-Benz" markalı nəqliyyat vasitələrinin sürücüləri yüngül bədən xəsarətləri alıblar.

Faktla bağlı Yasamal Rayon Polis İdarəsində araşdırma aparılır".