Hamilə qadını öldürüb qaçan sürücü budur; tutulub - VİDEO

Abşeron rayonu, Hökməli-Qobu yolunda iki piyadanın vurulmasına səbəb olan yol-nəqliyyat hadisəsi baş verib. ANS-in məlumatına görə, qəza zamanı naməlum sürücü idarə etdiyi avtomaşınla yolu keçən piyada Nuriyev Fərhad Kazım oğlu və onun həyat yoldaşı Əməşova Səbinə Nürüddin qızını vurub. Qəzadan sonra Səbinə xanım hadisə yerində dünyasını dəyişib. Onun həyat yoldaşı isə ağır vəziyyətdə bir saylı şəhər klinik xəstəxanasına çatdırılıb. Piyadaları vuran sürücü isə qəzadan sonra onlara heç bir yardım göstərmədən ərazidən uzaqlaşıb. Abşeron Rayon Polis Şöbəsinin əməkdaşlarının keçirdiyi əməliyyat nəticəsində piyadaları vuran sürücü Ehtiram Müzəffərli hadisədən təxminən 7 gün sonra saxlanılaraq istintaqa cəlb olunub. O, piyadaları idarə etdiyi “ZİL” markalı yük maşını ilə vurub.

Saxlanılan şəxs Ehtiram Müzəffərli deyir ki, "İki nəfər cıxdı qabağıma. Bu zaman ani olaraq maşınla vurdum. Onlar yolun qırağına düşdülər, qorxuduğum üçü qaçdım".

Ehtiram Müzəffərli barəsində artıq Abşeron Rayon Məhkəməsinin qərarı ilə həbs qəti-imkan tədbiri seçilib, istintaq davam edir.

Xatırladaq ki, qəza nəticəsində dünyasını dəyişən piyada Səbinə Əməşova Fərhad Nuriyevlə yeni ailə qurubmuş və o, hadisə zamanı hamilə olub.