Ksenona görə gözü qamaşan sürücü yola çıxan inəyi vurdu - ANBAAN VİDEO

Yolda baş verən qəza anbaan avtomobildəki kameraya düşüb. Avtosfer.az xəbər verir ki, günün qaranlıq saatlarında hərəkət edən sürücü yolu keçən iribuynuzlu heyvanı vurub. Buna səbəb isə qarşıdan gələn avtomobilin işıqlarının onun gözünü qamaşdırması olub. Sürücü yola çıxmış sahibsiz heyvanı son anda gördüyü üçün qəza qaçılmaz olub.

Son zamanlar yol polisi əməkdaşlarının işıq cihazlarına qarşı keçirtdiyi reydlər məhz belə qəzaların qarşısını almaq məqsədi daşıyır. Əksər sürücülər avtomobilin zavod tərəfindən quraşdırdığı işıq cihazlarına müdaxilə edərək led, ksenon tipli işıqlar quraşdırırlar.  Bunu isə mütəxəssis müdaxiləsi olmadan edirlər. Avadanlığı quraşdırdıqdan sonra onların yayıcılığını, işıq buraxmasını, düşmə bucağını nizamlamadan yola çıxırlar və sonda bu cür hadisələrin baş  verməsinə səbəb olurlar.

Məsələlərdən biri heyvanların yola buraxılmasıdır. Qanunvericiliyə görə heyvanlar sahibsiz şəkildə asfalt yola ötürülməməlidir. Bu hadisədə  sürücüyə dəymiş ziyanı yola çıxan heyvanın sahibi qarşılamalıdır.

Digər məsələ isə sürücünün təhlükədən, qəzadan yayınmasıdır. “Yol hərəkəti haqqında” qanunda qeyd olunub ki, sürücü hərəkət üçün təhlükə yarandığını gördükdə, nəqliyyat vasitəsinin sürətini tam dayanma həddinə qədər azaltmaq üçün mümkün olan tədbirləri görməlidir. Bu o deməkdir ki, sürücünün gözləri qamaşırsa sürəti azaltmalı və təhlükənin olmadığına əmin olduqdan sonra hərəkətini davam etdirməlidir.

Nərminə Əli