Baxımsız qalan qəbiristanlıq; sement kisələri, plastik butulkalar… - FOTO

Lənkəranda yerləşən "Kiçik Bazar" qəbiristanlığında antisanitar vəziyyət yaranıb. Avtosfer.az Teleqraf-a istinadən məlumatına görə, qəbiristanlığın müxtəlif hissələri plastik butulkalar, solmuş gül dəstələri, sement kisələri və digər məişət tullantıları ilə çirkləndirilib. Tullantıların vaxtında yığışdırılmaması ərazidə baxımsız mənzərə yaradıb. Sakinlərin sözlərinə görə, qəbiristanlığı ziyarət edən bəzi şəxslər zibilləri ayrılmış yerlərə deyil, ərazinin müxtəlif hissələrinə atırlar.

Şəhər sakini bildirib ki, hər həftə yaxınlarının məzarını ziyarət etməyə gəldikdə eyni mənzərə ilə qarşılaşır:

"Bu, həm ətraf mühitə, həm də dünyasını dəyişən insanların xatirəsinə hörmətsizlikdir. Qəbiristanlıq daim təmiz saxlanılmalıdır".

Sakinlər aidiyyəti qurumlardan qəbiristanlıq ərazisinin təmizlənməsini, tullantıların mütəmadi daşınmasını və ərazidə daimi nəzarətin təmin olunmasını xahiş edirlər.