Bu xəstəlikləri olanlar SKUTER SÜRMƏSİN - Həkimdən ciddi xəbərdarlıq

Elektrikli skuterlər bir çox insanlar üçün rahat nəqliyyat vasitəsi olsa da, sağlamlıq problemləri olan şəxslərə ciddi təhlükə yarada bilər. Avtosfer.az Publika.az-a istinadən xəbər verir ki, bu barədə nevroloq və psixiatr Tatyana Vinoqradova “Gazeta.Ru”ya açıqlamasında bildirib. Həkimin sözlərinə görə, elektrikli skuter sürmək üçün mütləq qadağa olmasa da, elə xəstəliklər var ki, bu zaman istifadə həm sürücü, həm də ətrafdakılar üçün təhlükəli ola bilər.

Hansı xəstəliklər risk yaradır?

Nevroloji problemlər:

Epilepsiya xəstələrində qəfil tutma riski var. Bu isə idarəetmənin itirilməsi və yıxılma ilə nəticələnə bilər. Mərkəzi sinir sistemi və koordinasiya pozğunluqları (beyincik, daxili qulaq xəstəlikləri və s.) da skuteri idarə etməyi təhlükəli edir. İnsultdan sonrakı vəziyyətlərdə isə tarazlıq və reaksiya sürəti zəifləyə bilər.

Ürək-damar xəstəlikləri:

Aritmiya, hipertoniyanın ağır formaları, ürək çatışmazlığı və infarktdan sonrakı vəziyyətdə skuter sürmək əlavə risk yaradır. Həkim bildirir ki, ani manevr və stress ürək tutmasına səbəb ola bilər.

Ortopedik problemlər:

Oynaqlar və onurğa xəstəlikləri olanlarda vibrasiya və zərbələr xəstəliyi ağırlaşdıra bilər. Protezli və ya ciddi deformasiya olan şəxslər xüsusilə risk altındadır.

Yaşlılar və hamilələr:

Yaş artdıqca koordinasiya və reaksiya zəifləyir, bu da yıxılma riskini artırır. Hamilə qadınlarda isə huş itirmə və stressə həssaslıq təhlükə yarada bilər.

Alkoqol və digər sərxoşedici hallar:

Həkim vurğulayıb ki, spirtli içki və ya digər sərxoşedici maddələr altında skuter idarə etmək həm təhlükəlidir, həm də qanunla cəzalandırılır.

Psixi və koqnitiv pozğunluqlar da riskdir

Mütəxəssis qeyd edib ki, bəzi psixi xəstəliklər və depressiv vəziyyətlər insanın yol vəziyyətini düzgün qiymətləndirməsinə mane olur. Bu isə qəza riskini artırır.

Həkimdən vacib xəbərdarlıq

Baş gicəllənmə, koordinasiya pozulması, əzələ zəifliyi və huşun itməsi kimi əlamətlər varsa, skuter istifadəsi dayandırılmalıdır. “Ən doğru addım əvvəlcədən həkimə müraciət etməkdir. Əgər bu əlamətlər skuter sürərkən yaranırsa, bu artıq ciddi xəbərdarlıqdır”, - deyə nevroloq bildirib.

Həkim həmçinin vurğulayıb ki, sağlam insanlar da təhlükəsizlik vasitələrindən - dəbilqə, dizlik və əlcəklərdən mütləq istifadə etməlidirlər.

Qeyd edək ki, daha əvvəl travmatoloqlar da elektrikli skuterlərin əsas təhlükələri barədə xəbərdarlıq etmişdilər.