Bakı-Gəncə və Bakı-Qəbələ aviareysləri ləğv olunur

Bakı-Gəncə-Bakı və Bakı-Qəbələ-Bakı aviareysləri ləğv olunur. Hər iki reysin ləğv olunmasına səbəb onların rentabelli fəaliyyət göstərməmələri ilə bağlıdır. Həmçinin reyslərin ləğv olunmasının səbəblərindən biri də sərnişinlərin beynəlxaq uçuşları həyata keçirmək üçün daha çox sözügedən hava limanlarından istifadə etməsidir. Belə ki, hər iki hava limanında beynəlxalq uçuşların qiymətləri Bakıya nisbətdə xeyli ucuz başa gəlir.

Qeyd edək ki, Bakı-Gəncə-Bakı istiqamətində uçuşların noyabrın 21-də dayandırılması nəzərdə tutulur.

AZAL-ın mətbuat xidmətinin rəhbəri Paşa Kəsəmənski də “Qafqazinfo”ya açıqlamasında faktı təsdiqləyib. O bildirib ki, Bakı- Gəncə-Bakı və Bakı-Qəbələ-Bakı reyslərində təyyarələr kifayət qədər dolmadığı və sözü gedən reyslər rentabelli olmadığı üçün ləğv olunacaq: «Artıq bu səbəblə Bakı-Qəbələ-Bakı istiqamətində uçuşlar həyata keçirilmir. Bakı-Gəncə-Bakı istiqamətində isə uçuşlar noyabrın 21-də ləğv ediləcək”.