Bu halda dayanma-durmaya görə təkrar cərimə YAZILMAYACAQ

Milli Məclisin bu gün keçirilən plenar iclasında İnzibati Xətalar Məcəlləsinə edilən dəyişiklik layihəsi üçüncü oxunuşda müzakirəyə çıxarılıb. Müzakirə zamanı məcəllənin 346-cı maddəsində edilmiş dəyişikliyə düzəliş olunub. Avtosfer.az xəbər verir ki, təklif olunan dəyişiklikdə qeyd olunmuşdu ki, şəxs bu Məcəllənin 346-cı maddəsində nəzərdə tutulmuş eyni inzibati xətanın törədilməsinə görə gün ərzində təkrar məsuliyyətə cəlb edilə bilməz.

Edilən bu təklif konkret olaraq dayanma-durmaya görə sürücünün gün ərzində bir dəfə məsuliyyətə cəlb edilməsini ehtiva edirdi. Lakin Milli Məclisin keçirilən bu günkü plenar iclasında həmin hissəyə düzəliş edildi. “Şəxs bu Məcəllənin 346.1-ci və ya 346.2-ci maddələrində nəzərdə tutulmuş inzibati xətanı törətməyə fasiləsiz davam edirsə, həmin inzibati xətanın törədilməsinə görə gün ərzində təkrar inzibati məsuliyyətə cəlb oluna bilməz." Sürücü avtomobilini dayanma-durma qadağan olan yerdə park edib gedirsə, deməli inzibati xəta hadisəsi davam etmiş sayılır. Buna görə də sürücü avtomobilini oradan götürənə kimi gün ərzində iki dəfə cərimə edilə bilməz.

Təbriz