Dəmiryolundan istifadə edənləri yeniliklər gözləyir - VİDEO

Bakı sərnişin dəmiryolu vağzalının binası gələn ilin ortalarında istifadəyə veriləcək. Burda dəmiryolunun xidmətindən istifadə edənləri bir sıra yeniliklər gözləyir.

Avtosfer.az anstv-yə istinadən xəbər verir ki, Bakı sərnişin dəmiryolu vağzalında əsaslı təmir işləri davam edir. Vağzalın əsas binasının fasadı, memarlıq üslubunun saxlanması şərtilə yenidən qurulur. 

Binanın daxilində isə arakəsmələr sökülərək tam yenidən qurulur. “Azərbaycan Dəmir Yolları” Qapalı Səhmdar Cəmiyyəti mətbuat xidmətinin rəhbəri Nadir Əzməmmədov deyir ki, təmirdən sonra vağzalda bir sıra yeniliklər də olacaq: “Həm beynəlxalq, həm də ölkə ərazisinə gələn qatarlar üçün iki tunel var. Eyni zamanda Bakı-Sumqayıt istiqamətində də hərəkət edən elektrik qatarı üçün daha iki tunel. Hazırda tunellərdə işlər davam edir. Beləliklə sərnişinlər bu tunellərdən istifadə etməklə “28 May” metrostansiyasına çıxaraq yollarına davam edəcəklər”.

Bundan başqa vağzalda sərnişinlərin istirahəti də nəzərə alınıb. Təmirdən sonra burada bir sıra kafe və restoranlar fəaliyyət göstərəcək. Yuxarı mərtəbələrdə isə əvvəl olduğu kimi mehmanxana yerləşəcək. Xidmət rəhbəri bildirir ki, bilet kassaları, saxlama kameraları, ana və uşaq otağı, sərnişin platformaları müasir üslubda əsaslı təmir olunur, həmçinin eskalatorlar və liftlər yenisilə əvəzlənəcək, sərnişinlər “Wi-Fi” sistemindən istifadə edə biləcəklər. Əsaslı təmir işlərinin 2016-ci ilin ikinci yarısında başa çatması nəzərdə tutulur. XIX əsrin memarlıq abidələrindən olan Bakı sərnişin vağzalı 1884-cü ildə istifadəyə verilib. 1977-ci ildə Bakı sərnişin stansiyasında 10 min sərnişinlik yeni vağzal binası tikilib. Sərnişinlərə xidmət üçün nəzərdə tutulan və mehmanxanası olan 16 mərtəbəli vağzal Zaqafqaziyada eyni tipdən olan obyektlərin ən böyüyü olub.