Yol polisindən qeyri-adi jest - Ağlayan uşağa hədiyyə verdi - FOTO

Azərbaycanda yol polisi nümunəvi jesti ilə diqqət cəlb edib. Avbtosfer.az xəbər verir ki, bununla bağlı məlumat sosial şəbəkələrdə yayılıb. Binəqədi Rayon Dövlət Yol Polis Şöbəsinin əməkdaşları polis kapitanı Məftun İsrafilov və baş cavuş Əliyev Ceyhun 99-YP-249 dövlət qeydiyyat nişanlı avtomobillə xidmətdə olarkən Asif adlı şəxsin maşınını saxlayıblar. Polis əməkdaşları sürücünün sənədlərini yoxlayan zaman avtomobildə olan 5 yaşlı uşaq qorxub və ağlamağa başlayıb. Bu zaman polislər azyaşlı oğlana polis maşını olan oyuncaq hədiyyə ediblər. Həm sürücü, həm də onun ailə üzvləri polisin nümunəvi addımını təqdir ediblər. Sürücünün qohumları sosial şəbəkədə bu hadisə ilə bağlı paylaşım edərək, Azərbaycan polisinin nümunəvi addımına görə öz minnətdarlıqlarını bildiriblər.

Avtosfer.az xəbər verir ki, unikal.org-a açıqlama verən Binəqədi Rayon Dövlət Yol Polis Şöbəsinin əməkdaşı, polis kapitanı Məftun İsrafilov xəbəri təsdiqləyib: "Dünən biz xidmətdə olarkən bu hadisə baş verdi. Bizim DYP avtomobillərində maşın oyuncaqlar və gəlinciklər olur. Qayda pozan avtomobilləri saxlayanda maşında olan azyaşlılara hədiyyə edirik ki, qorxub ağlamasınlar. Çünki biz də insanıq, bizim də ailəmizdə azyaşlılar var. Uşaqlara qarşı diqqətli olmağa borcluyuq. Belə hallarla qarşılaşanda onların sevincini görmək bizim özümüzə də xoş olur".

Bakı şəhər DYPİ-nin bölmə rəisi, polkovnik Vaqif Əsədov Avtosfer.az-a bildirdi ki, Binəqədi DYPŞ-nin rəisi təyin edilən Mərdan Əliyev artıq bir sıra islahatlar aparıb, yeniliklər edib. Onlardan da biri uşaqlara diqqət və qayğı göstərməkdir: "Bu, bizim xidmətimizin bir formasıdır. Polis hər zaman insanların təhlükəsizliyini düşünür və onların qayğısına qalır. Təbii ki, uşaqlar da diqqətdən kənarda qalmamalıdır".