Ekipaj üzvləri arasında 6 azərbaycanlı olan gəmi Qara dənizdə SOS siqnalı paylaşıb - FOTO

Tanzaniya bayrağı altında üzən AMANOS adlı yük gəmisi istənilən vaxt Rumıniya sahillərində bata bilər.

Avtosfer.az-ın məlumatına görə, gəmidə 6-sı azərbaycanlı, 2-si türkiyəli olmaqla 8 ekipaj üzvü var.

Rumıniyanın Manqalia şəhərindən 2 kilometr məsafədə gəmidən SOS siqnalı göndərilib. Gəminin heyəti Rumıniya Sahil Mühafizəsi Xidmətindən kömək istəyib və gəminin burnunun qırıldığını və suyun gəmiyə daxil olduğunu bildirib. Onun tezliklə su altında qala biləcəyini və batacağını güman edərək, dərhal xilasedici gəmilər göndərilib. Bununla belə, “Teia”, “Brisco” və “Feniks” adlı üç xilasetmə gəmisi hadisə yerinə gələndə gəminin kapitanı xilasedicilərə gəmiyə minməyə icazə verməyib və onlardan kömək almaqdan imtina edib. O bildirib ki, ekipaja dəyən ziyanı aradan qaldıra və kiçik təmir işləri apara bilər. Daha sonra Bolqarıstan sularına doğru dənizə yola düşüb. Gəmiyə hansı yükün yükləndiyi məlum olmasa da, kapitanın özünü necə aparması çoxlu suallar yaradıb. Gəminin təfərrüatları, sahibi və daşıdığı yükün növü ilə bağlı şübhələrin artmasına səbəb olan bu davranışların səbəbi naməlum olaraq qalır.

Leyla