Çin elektromobilləri ilə bağlı daha bir yoxlama

Çin istehsalı olan elektromobillər dünyanın əksər ölkələrinə uğurla ixrac edilir. Lakin çinli istehsalçıların əsas hədəfi Avropa bazarı olaraq qalır. 

Avtosfer.az-ın xəbərinə görə, bu hədəfə nail olmaqsa elə də asan deyil. Çində 50-dək elektromobil istehsalçısı olsa da, Avropaya məhsul ixrac edən şirkətlərin sayı beşi keçmir. Avropalılar bir çox kriteriyaya görə Çin modellərini bəyənməsələr də, qiymət faktoruna görə bu maşınları seçirlər. Hökumətin qeyri-rəsmi dəstəyi sayəsində Çində maya dəyəri ucuz maşınlar istehsal edilir. Rəsmi olaraq hökumət istehsalçılara subsidiyaları dayandırsa da, regionlar istehsalçıları cəlb etmək üçün onlara bu və ya digər formada kömək gəstərir.
İndiyədək Çin maşınlarının Avropa bazarına ayaq açmasına təhlükəsizlik və ekoloji standartlar, kraş testlər və maral testləri mane olurdu. İndi bura siyasi və iqtisadi tələblər də əlavə edilib. Bunu Avropa Komissiyasının prezidenti Ursula fon der Lyayen Avropa parlamentindəki son çıxışında dilə gətirib: “Misal olaraq elektromobil sektorunu götürək. Bu, Avropada böyük potensiala malik təmiz iqtisadiyyat üçün mühüm sənayedir. Lakin qlobal bazarlar indi daha ucuz Çin elektrik avtomobilləri ilə doludur. Və onların qiymətləri böyük dövlət subsidiyaları ilə süni şəkildə aşağı saxlanılır. Beləliklə, mən bu gün elan edə bilərəm ki, Komissiya Çindən gələn elektrik avtomobilləri ilə bağlı anti-subsidiya araşdırmasına başlayır”.
Bu gündən start götürən yoxlama 13 ay davam edəcək. Subsidiya alan istehsalçıların maşınlarına əlavə rüsum tətbiq ediləcək.

Vüqar