“Moskviç” taksiyə uyğun gəlmədi, “Avtovaz” inhisarçıya çevrilir

Rusiya Dövlət Şurası taksi fəaliyyəti ilə bağlı yeni qanun hazırlayıb. 

Avtosfer.az xəbər verir ki, artıq müzakirə mərhələsində olan qanun layihəsində taksi avtomobillərinin sırf yerli istehsal olması tələb kimi qarşıya qoyulur. Avtomobil istehsalçılarının təzyiqi ilə hazırlanan qanunda göstərilir ki, bu yolla ölkənin texniki suverenliyi təmin olunacaq, sanksiya təzyiqi azalacaq. 

Tələbə görə, yalnız yüksək lokallaşma dərəcəli (yəni, detalların çoxu Rusiyada istehsal olunan) yerli maşınlardan taksi fəaliyyətində istifadə edilə bilər. 

Ekspertlərin qənaətinə görə, burada məqsəd yerli avtomobillərə süni tələbat formalaşdırmaqdır. Qanun qüvvəyə minərsə, yalnız “Avtovaz”, UAZ və “Haval” kriteriyalara uyğun gəldiyindən taksi kimi istifadə olunacaq. Qalmaqallı “Moskviç” isə bir neçə detalı çıxmaqla Çin modeli olaraq qalır. Faktiki olaraq bu qanun “Avtovaz”ı taksi bazarında inhisarçıya çevirəcək. 

Taksi şirkətlərinin rəyini isə heç kim nəzərə almayıb.

Vüqar