Bakının məhşur prospektində sürət həddi artırılacaq – FOTO

“Bakının Ziya Bünyadov prospektində aparılan yenidənqurma nəticəsində zolaqların sayı 10-a çatdırılacaq, yəni 5 gediş, 5 gəliş hərəkət zolağı olacaq. Onlardan 2-si sürətli hərəkət üçün nəzərdə tutulub. Əvvəllər isə prospektdə 4 zolaq var idi. 2 gediş, 2 gəliş zolağı”. Bu barədə “Azəryolservis” ASC-nin mətbuat xidmətinin rəhbəri Pünhan Mürsəliyev bildirib. Onun sözlərinə görə, Ziya Bünyadov prospektində aparılan işlər nəticəsində avtomobillər 20 yanvar dairəsindən və “Qələbə” kinoteatrının yaxınlığındakı dairədən “Koroğlu” metrostansiyasına doğru və geri istiqamətdə maneəsiz və sürətli hərəkət edəcək. O, bildirib ki, sürətli hərəkət zolaqlarında hansı sürətin müəyyən ediləcəyi hələlik məlum deyil. Pünhan Mürsəliyev prospektin rekonstruksiyasının 2014-cü ilin sonuna qədər başa çatdırılacağını deyib. “Ərazidə gecə-gündüz iş gedir. Prospekti vaxtından əvvəl təhvil verməyə çalışırıq. Yay aylarında təhvil verə bilməsək, ən uzağı ilin sonuna qədər istifadəyə veriləcək”, deyə P.Mürsəliyev bildirib.