Mirziyoyev konveyerdən çıxan ilk elektromobilə imza atıb - FOTO

Özbəkistan Prezidenti Şavkat Mirziyoyev Cizak vilayətində BYD avtomobil zavodunda olub.

Avtosfer.az xəbər verir ki, dövlət başçısı konveyerdən çıxan ilk elektromobilin üzərində öz imzasını qoyub.

Zavod yanvar ayında işə salınıb. Bu, dəyəri 160 milyon dollar olan və ildə 50 min elektrik avtomobili istehsal gücünə malik layihənin birinci mərhələsidir.

Önümüzdəki illərdə zavod model çeşidini genişləndirməyi planlaşdırır. Dəyəri 300 milyon dollar olan layihənin ikinci mərhələsi çərçivəsində istehsalın ildə 200 min elektrik avtomobilinə, üçüncü mərhələ çərçivəsində isə 500 milyon dollar dəyərində 500 min elektrik avtomobilinə çatdırılması planlaşdırılır.

Lokallaşma səviyyəsi tədricən artacaq. İlk növbədə, bamper, şüşə, lak və plastik hissələrin istehsalı qurulacaq. Gələcəkdə akkumulyatorlar, elektrik mühərrikləri, alüminium hissələri, təkərlər və oturacaqların istehsalı planlaşdırılır.

Bundan əlavə, lokallaşdırma layihələri vasitəsilə istehsal xərclərinin azaldılması tədbirləri müzakirə olunub. Hesabatda qeyd olunur ki, gələcək üçün məqsəd regionun bazarlarına çıxmaqdır.

Şirkətdə 1,2 min nəfər çalışır. Keçən il "UzAuto Motors" zavodlarında 200 işçi təlim keçib. Bu il daha 92 mütəxəssis Çinin Sian və Çanşa şəhərlərində keyfiyyətə nəzarət, texnologiya, təchizat və avadanlıqlara texniki xidmət sahələrində təlim keçəcək. Üçüncü mərhələdə işçilərin sayı 10 minə çatacaq.

(modern.az)