“Nissan” ABŞ-da ən çox satılan avtomobil modelinin istehsalını azaldacaq

Nissan Donald Tramp administrasiyasının tətbiq etdiyi yeni tariflər səbəbindən istehsal planlarına yenidən baxmağa məcburdur. Yaponiyanın Kyuşu zavodunda ABŞ-ın ən çox satılan yolsuzluq avtomobili “Rogue” modelinin istehsalı 2025-ci ilin may ayından iyula qədər 13 min ədəd azalacaq.

Avtosfer.az xəbər verir ki, ABŞ Prezidenti Donald Trampın xaricdə istehsal olunan avtomobillərə 25 faizlik vergi tətbiq etmək qərarı qlobal avtomobil tədarük zəncirini alt-üst edib. Yaponiyanın üçüncü ən böyük avtomobil istehsalçısı olan “Nissan” buna bəzi rəqiblərindən daha həssasdır. “Reuters” xəbər verir ki, Birləşmiş Ştatlar onun əsas bazarıdır və keçən il satdığı avtomobillərin dörddəbirindən çoxu bu ölkəyə göndərilib. Onların əksəriyyəti Yaponiya və ya Meksika istehsalıdır.

“Nissan”ın ən böyük Kyuşu zavodunda işçilər may ayından iyula qədər daha az saat işləyəcək və bəzi günlərdə istehsal dayandırılacaq. Avtomobil istehsalçısı tarif perspektivindən asılı olaraq istehsal vəziyyətini daha sonra nəzərdən keçirəcək.

Donald Tramp bazar ertəsi avtomobil vergisini dəyişdirməyi düşündüyünü söyləyib. Onun fikrincə,, avtomobil istehsalçılarının bir az vaxta ehtiyacı var.

Tariflər tətbiq edilməzdən əvvəl də “Nissan” böhrandan çıxmaq planının bir hissəsi olaraq qlobal gücü 20 faiz azaltmağı planlaşdırırdı.