“Tesla” misli görünməmiş ziyana uğrayıb

Yanvar-mart aylarında “Tesla” şirkətinin avtomobil tədarükləri pessimist proqnozlarda belə yer almayan səviyyəyə enib.

Avtosfer.az xəbər verir ki, “Bloomberg” agentliyinin məlumatına görə, “Tesla” səhmləri cümə günü müntəzəm ticarətdən öncə beş faizdən çox ucuzlaşıb. Səhmlərin qiymətinin rekord həddə çatdığı dekabrın 17-dən bəri ucuzlaşma 44 faiz təşkil edib.

2025-ci ilin ilk üç ayında “Tesla” şirkəti 336 min 681 avtomobil tədarük edib. Bu, 2022-ci ildən bəri ən pis rüblük nəticədir.

Ekspertlərin fikrincə, ABŞ-da keçirilən prezident seçkilərində Donald Trampın sponsoru olan İlon Mask dəfələrlə avropalı siyasətçiləri tənqid edib və ifrat sağçı partiyaları dəstəkləyib. Bu, onun sahib olduğu şirkətə mənfi təsir göstərib. Məsələn, ötən rübdə Almaniyada “Tesla” avtomobillərinin satışları 62 faiz azalıb.