Ata ilə azyaşlı qızını avtomobil vurdu - VİDEO

Bakının Xətai rayonu ərazisində iki piyadanın vurulması ilə nəticələnən yol nəqliyyat hadisəsi baş verib. ANS-in məlumatına görə, Nobel prospektində qeydə alınmış yol qəzası, ata ilə azyaşlı qızının yolu keçmək istəməsi zamanı qeydə alınıb. Müəyyən edilib ki, “Mercedes” markalı avtomobil şəhərin mərkəzindən Zığ yolu şossesi istiqamətində hərəkətdə olarkən paytaxt sakini Qismət Hacıyevi və onun azyaşlı qızını vurub.

Avtomobilin sürücüsü vəziyyəti nisbətən ağır olan azyaşlını götürərək xəstəxanaya aparıb. Ata Qismət Hacıyevə isə əraziyə cəlb olunmuş təcili tibbi yardım briqadası tərəfindən yardım göstərilib.

Hadisəyə səbəb kimi yüksək sürət göstərilsə də, həmin ərazidə piyada keçidinin olmaması da diqqətə çatdırılıb. Bu, əslində ətraf sakinləri də narahat edən məsələlərdən idi. Yol qəzasının təfərrüatlarını isə Xətai RPİ-nin istintaqçıları araşdırır. Artıq sürücü saxlanılaraq ifadəsi alınıb.