Bakı metrosunda dolaşan kabus: Necə xilas olaq?

Bir sıra xarici ölkələrdəki metrostansiyalarda təhlükəsizlik məqsədilə platforma ilə relslər arasında arakəsmə mövcuddur. Bunun olması sıxlıqla bağlı xoşagəlməz hadisələrin qarşısını alır. Bir neçə gün bundan öncə Bakı metrosunda yaşanan bədbəxt hadisə belə bir məsələni yenidən gündəmə gətirib ki, bizdə də oxşar təhlükəsizlik tədbirinə ehtiyac var. Çünki pik saatlarda metrostansiyalarda sıxlıqla əlaqədar analoji halların təkrarlanması qaçılmazdır.

Avtosfer.az xəbər verir ki, problemi “Yeni Sabah”a şərh edən təhlükəsizlik eksperti Elmar Nurəliyev bildirib ki, metrostansiyalarda təhlükəsizlik qapılarının olması vacib olsa da, bunun ərsəyə gətirilməsi olduqca mürəkkəbdir:

“Metrostansiyalarda təhlükəsizlik üçün arakəsmənin qoyulması inşa zamanı layihədə nəzərdə tutulan bir prosesdir. Bu, layihələndirmədə infranstruktur nəzərə alınaraq həyata keçirilməlidir. Daha sonradan da təhlükəsizlik üçün belə bir addım atıla bilər. Hətta dünya təcrübəsində də buna oxşar nümunələr var. Ancaq bu düşünüldüyü qədər sadə bir şey yox, olduqca mürəkkəb bir prosedurudr. Bir-iki gün ərzində quraşdırılması mümkün deyil”.

Ekspert bildirib ki, bədbəxt hadisələrin qarşısının alınması üçün kifayət qədər önləyici təlimatlar var:

“Təhlükəsizlik qapılarının olması insanların ehtiyatsızlıqdan qatar relsinin üzərinə düşüb xəsarət alması, həyatını itirməsi kimi hadisələrin qarşısını alır. Təhlükəsizlik cəhətdən tədbirlər planının bir hissəsi kimi qəbul edilir. Lakin təhlükəsizlik üçün nəzərdə tutulan digər amillər, metrostansiyanın içərisində təhlükəsizlik xəttinin keçilməməsi kimi kifayət qədər önləyici tədbirlər, təlimatlar var ki, sərnişinlər buna diqqət etməlidirlər. Ani bir ehtiyatsızlıq, yaxud sərnişinlərdən birinin digərinə toxunması onların relslərin üzərinə düşməsinə, həmçinin digər bədbəxt hadisələrə yol aça bilər. Bunlar kompleks tədbirlər planının bir hissəsidir. Təhlükəsizlik qapılarının da quraşdırılması daha yaxşı olar. Yenə də qeyd edim ki, bu asan iş deyil. Bu işin ərsəyə gəlməsi üçün geniş layihə hazırlamaq lazımdır”.