Bakı-Sumqayıt dəmir yolundan yeni xəbər var

Dəmir yolunun Bakı-Xırdalan-Sumqayıt sərnişin sahəsində əsaslı təmir işləri davam etdirilir. Avqustun 25-dən Sumqayıt baş stansiyasına daxil olmadan Sumqayıt sərnişin stansiyasına hərəkət etmək üçün 1,65 kilometr uzunluğunda yeni birləşdirici yolun qoyuluşuna başlanılır. İlkin olaraq bu yolun üzərində yoldəyişdirici qurğular qoyulacaq. “Azərbaycan Dəmir Yolları” QSC-dən Avtosfer.az-a bildirilib ki, Bakı-Sumqayıt xətti boyunca yerləşən stansiyalarda bəzi tamamlama işləri görülür. Bakı-Xırdalan-Sumqayıt sərnişin sahəsində 63 kilometr uzunluğunda dəmir yolunun əsaslı təmir işlərinə martın 3-dən start verilib və bu günə kimi 61 kilometr yol əsaslı təmir olunub. Əsaslı təmir işlərini “Azərbaycan Dəmir Yolları”nın İnfrastruktur Departamentinin iştirakı ilə “Dəmiryolservis” MMC-nin müəssisələri həyata keçirir. Əsaslı təmir işləri başa çatdıqdan sonra elektrik qatarlarının Bakı sərnişin stansiyasından Sumqayıt sərnişin stansiyasına qədər getməsinə 40 dəqiqə vaxt sərf olunacaq.

Cavid