Bakı-Sumqayıt qatarında vahid kartın istifadəsinə nə vaxt başlanılacaq?

Bakı-Sumqayıt sərnişin qatarında vahid kart sisteminin tətbiqi istiqamətində işlər sürətlə davam etdirilir. Avtosfer.az xəbər verir ki, bu barədə trend-ə açıqlamasında "Azərbaycan Dəmiryolları" QSC-nin mətbuat xidmətinin rəhbəri Nadir Əzməmmədov deyib.

Onun sözlərinə görə, stansiyalarda "Bakı Kart" terminalları quraşdırılsa da, sərnişinlərin ondan nə vaxt istifadə edəcəklərini demək çətindir: "Bakıdakı Dəmir Yolu Vağzalında artıq terminallar var. Amma buna baxmayaraq, hələlik sərnişinlər arasında gediş-gəliş haqqı nəğd hesablaşma ilə həyata keçirilir. Sərnişinlərin "Bakı Kart"dan istifadə etməsi üçün işlər sürətlənib".

N.Əzməmmədov Bakı-Sumqayıt qatarına əhali tərəfindən böyük marağın olduğunu qeyd edib və bildirib ki, bu istiqamətlərdə sərnişin sıxlığı olur.

Qurum rəsmisi vurğulayıb ki, hazırda qatarlar qrafik üzrə hərəkət edir, amma gələcəkdə sərnişin sıxlığını nəzərə alaraq qatarların sayının artırılması istisna deyil.