Bakıda tozun qarşısını almaq üçün TƏKLİFLƏR

Bakıda küləyin yaratdığı toz insan sağlamlığı üçün çox təhlükəlidir. Bununla bağlı həkimlər də həyəcan təbili çalırlar. 

Bakı və ətraf ərazilərdə küləyin yaratdığı tozun qarşısını almaq üçün hansı ekoloji tədbirlər görülə bilər?

Avtosfer.az-ın məlumatına görə, mövzu ilə bağlı danışan ekoloq Rövşən Abbasov bildirdi ki, Bakıda havanın daha tozlu olmasının təbii və insan mənşəli səbəbləri var. Onun sözlərinə görə, havanın tozlu olmasına təsir edən təbii səbəblərdən biri Abşeron yarımadasının əsasən quraq ərazidə yerləşməsi, bitki örtüyünün zəif olmasıdır ki, bunlar da əlavə tozlanmalara səbəb olur:

"Bəzi hallarda Bakıya sərhəd tozları da gəlir. Belə ki, bu tozlanma Xəzər dənizi üzərindən Türkmənistan ərazisindən gələ bilir və Bakı ərazisində kəskin artır. Şəhərdə tozlanmaya səbəb olan əsas məslələr sırasında tikini şirkətlərinin standartlara əməl etməməsi, avtomobillərin hərəkəti zamanı ətrafa yayılan toz hissəcikləri də tozlanmanın artmasına səbəb olur. Bunun qarşısını almaq üçün avtomobillərin sayını azaldıb, ictimai nəqliyyatı gücləndirmək lazımdır".

Ekspert bildirdi ki, tozun qarşısını almaq üçün yaşıllıqların sayı daha da artırılmalıdır.

"Yeni parklar salınmalıdır. Son vaxtlar sökülən evlərin yerinə parkların salınması düşünülən məsələlərdəndir. İnsanlar tozlu havada özünü qorumağı bacarmalı, maskadan istifadə etməlidir. Tozlu havalarda evdən çıxmaq məsləhət görülmür", - deyə R.Abbasov qeyd etdi (redaktor.az).