Bayramdan istifadə edən sahibkar qanunsuz obyekt tikir - FOTO

Paytaxtın bir sıra rayonlarında illərdir bayram günlərindən istifadə edərək qanunsuz əməllərinə davam edən sahibkarlar yenə ortaya çıxıb.
Avtosfer.az xəbər verir ki, Bakının Nizami rayonunda əvvəllər məktəbin ərazisi daxil olan ərazilər indi sahibkarlıq subyektlərinin istifadəsinə verilib.
Belə ki, rayonun Qara Qarayev prospektində yerləşən 61 nömrəli orta məktəbin ərazisi avtoyuma və təmir məntəqələri tərəfindən özəlləşdirilib. Uzun müddətdir ərazidə tikintiyə mane olunduğu təqdirdə, bayram tətilindən istifadə edən sahibkar ərazini hasarlayıb və yeni avtoyuma məntəqəsi tikmək niyyətinə düşüb.
Martın 20-dən etibarən tikinti işləri gecə-gündüz davam etdirilir. Vətəndaşlar həm tikintinin qanunsuz olmasından, həm də gecə saatlarında gizli şəkildə səs-küylə aparılmasından şikayət edir.
Məsələ ilə bağlı Nizami Rayon İcra Hakimiyyəti ilə əlaqə saxladıq. Qurumdan sorğumuza cavab olaraq bildirildi ki, araşdırma aparılacaq və hansısa qanunazidd əməl aşkarlandıqda müvafiq tədbirlər görüləcək.