Bələdçilərin ingiliscə danışması ilə bağlı məsələyə - AZAL-dan cavab

“AZAL, J2109-la Praqaya uçuram. Elanlar yalnız ingilis dilində, bələdçilər ingilisdilli...”

Avtosfer.az xəbər verir ki, bu barədə hüquq müdafiəçisi Mirvari Qəhrəmanlı paylaşım edib.

Uçuş zamanı heyətin ingilis dilində danışmağı M.Qəhrəmanlıda suallar yaradıb: “Bu halda uçduğum təyyarə hansı ölkəyə mənsubdur? Niyə mənim ölkəmə məxsus olan hava yollarında bütün heyət ingilisdillidir?”

AZAL hüquq müdafiəçisinin suallarına elə paylaşımın rəy bölümündə cavab verib: “Azərbaycanın milli aviadaşıyıcısı AZAL sərnişindaşımaya artan tələbatı ödəmək üçün üç “Airbus A320” təyyarəsinin qısamüddətli lizinqinə dair müqavilə imzalayıb.

Dünya təcrübəsində geniş yer alan lizinq sazişi çərçivəsində hava gəmilərinin icarəsi ilə yanaşı, uçuş heyətinin təminatı, texniki dəstək, sığorta, uçuşların keyfiyyəti və təhlükəsizliyini təmin edən xidmətlər də nəzərdə tutulur.

Xarici uçuş heyəti ilə yarana biləcək dil maneələrini aradan qaldırmaq üçün əksər hallarda icarəyə götürülən təyyarələrdə əcnəbi heyətlə yanaşı, AZAL-ın öz təyyarə bələdçiləri də mövcuddur”.

Qurumun məlumatında vurğulanıb ki, marşrut şəbəkəsini və uçuşların tezliyini genişləndirməkdə davam edən AZAL sərnişinlərin artan tələbatını ödəmək məqsədilə lizinq təyyarələrindən İstanbul, Dubay, Milan, Vyana, Almatı, Astana və digər marşrutlarda istifadə edir.