Bilal Əliyevdən hicab açıqlaması: "10 dəfə Həcc ziyarətinə getmişəm..."

Məktəblərdə vahid geyim qaydaları ətrafında müzakirələr davam edir. Qərardan sonra yaranan manipulyasiyalar bəzi hallarda məktəblərin qarşısında gərginliyə, şagirdlərin dərslərdən yayınmasına və təhsil müəssisələrinin əmlakına ziyan vurulmasına səbəb olub.

Avtosfer.az xəbər verir ki, Xalq artisti Bilal Əliyev mövzu ilə bağlı Oxu.az-a danışıb.

O qeyd edib ki, məktəblərdə hər kəs eyni geyimdə olmalıdır:

"Məktəblilər vahid geyimləri ilə hər kəsdən seçilməlidirlər. Hicab məsələsi adı altında dövlət əmlakına ziyan vuranlar düz iş görmürlər. Dövlət onsuz da ölkəmizdə qarışıqlıq yaratmaq istəyən xarici qüvvələrin hər birini öhdəsindən gələcək. Həmçinin onların cəzasını Allah verəcək".

O, açıqlamasında Azərbaycan xalqına müraciət edib:

"Vətəndaşlarımıza demək istəyirəm ki, ayıq olun. Bizim çox ağıllı Prezidentimiz var, böyük ulu öndər məktəbi keçib. Başqa qüvvələrə inanmaq lazım deyil. Yad ölkənin insanı ancaq özünü düşünür, bizi yox. Xalqımızı bir olmağa çağırıram. Heç kim demir ki, dindən uzaqlaşın, dinimiz əzizdir. Mən 10 dəfə Həcc ziyarətinə getmişəm, amma məktəbə hamı eyni formada getməlidir".

Xatırladaq ki, Nazirlər Kabinetinin 21 sentyabr qərarı ilə "Dövlət ümumi təhsil müəssisəsi təhsilalanlarının geyim formalarının təsvirləri"ndə dəyişiklik edilib. Həmin qərara əsasən, təhsilalanların müəyyən edilmiş geyim formasının vahidliyini pozan, habelə ümumi təhsilin dünyəvilik prinsipinə uyğun olmayan digər geyim elementlərindən istifadə edilməsinə yol verilmir.

Həmçinin adıçəkilən qurumun 6 oktyabr qərarı ilə də "Dövlət ümumi təhsil müəssisəsində təhsilverənlər üçün geyim ilə bağlı Tələblər"in təsdiq olunub. Sözügedən qərarda da müəllimlər üçün geyim normaları müəyyənləşdirilib.