Binəlilər qəsəbə daxili yollardan şikayətçidir - VİDEO

Qışda palçıqdan, yayda isə toz-torpaqdan əziyyət çəkirlər...

Görüntülər paytaxtın Binə qəsəbəsində lentə  alınıb. Qəsəbənin südçülük savxozu adlanan ərazisinin qayğıları bitib-tükənmək bilmir.

Sakinlər küçələrin keçilməz olduğunu, tullantıların atılması üçün xüsusi yerlər ayrılmadığını  və susuzluqdan əziyyət çəkdiklərini dilə gətirilər.

Məsələ ilə bağlı Xəzər Rayon İcra Hakimiyyətindən  bildirildi ki, sözügedən qəsəbə ərazisində istismara yararsız yolların təmiri işlərinin Dövlət İnvestisiya Proqramında nəzərdə tutulan prioritet layihələrin siyahısına əlavə olunması üçün Avtomobil Yolları Dövlət Agentliyinə bir neçə dəfə rəsmi müraciət ünvanlanıb.

Avtomobil Yolları Dövlət Agentliyindən isə  bildirlib ki, dövlət proqramı  çərçivəsində sentyabr ayına kimi məsələ öz həllini tapacaq.

Dövlət Su Ehtiyatları Agentliyinin rəsmisi Anar Cəbrayıllı isə bildirib ki, Binə qəsəbəsinin təxminən 35 faizi mərkəzləşdilmiş su şəbəkəsi ilə təmin olunub. Digər ərazilərdə su xəttləri mövcud deyil. Şəhərin şərq hissəsinə dövlət proqramı çərçivəsində yeni magistral su xəttlərinin çəkilməsinə başlanılıb. Bu da su olmayan ərazilərin su ilə təmin olunmasına imkan verəcəkdir.

Daha ətraflı videomaterialda.