Bu ərazilərə yalnız avtobusların giriş-çıxışına icazə veriləcək - Tıxac probleminin qarşısı ...

İngiltərədə tıxacların azaldılması məqsədilə bəzi yolların yalnız ictimai nəqliyyat üçün ayrılması təcrübəsi müzakirə mövzusu olaraq qalır. Bu modelin Azərbaycanda tətbiq olunub-olunmayacağı isə maraq doğurur. Avtosfer.az-ın məlumatına görə, mövzu ilə bağlı "Konkret.az"a açıqlama verən nəqliyyat məsələləri üzrə ekspert Yasin Mustafayev bildirib ki, tıxac probleminin qarşısını almaq üçün dünyada müxtəlif addımlar atılır və bu, qlobal bir problemdir. Onun sözlərinə görə, bir çox ölkələrdə elə küçə və yollar var ki, həmin ərazilərə yalnız ictimai nəqliyyatın girişinə icazə verilir.

Ekspert qeyd edib ki, bu cür praktikanın Azərbaycanda da tətbiqi mümkündür, lakin məsələ düşünülmüş şəkildə həyata keçirilməlidir:

“Belə yerlər seçilməlidir ki, orada yaşayan insanlar üçün ciddi problem yaranmasın, vacib giriş-çıxışlara məhdudiyyət tətbiq ediləndə əlavə çətinliklər ortaya çıxmasın. Elə ərazilər müəyyənləşdirilməlidir ki, həmin yollarda yalnız ictimai nəqliyyat işləyə bilsin və digər nəqliyyat vasitələrinin hərəkəti məhdudlaşdırılsın”.

Y.Mustafayevin fikrincə, nəqliyyat vasitələrinin sayının sürətlə artmasının qarşısını almaq üçün bu cür tədbirlər qaçılmazdır:

“Nəqliyyat vasitələrinin artım tempini azaltmaq yalnız bu cür mexanizmlərlə mümkündür. Başqa alternativ yoxdur. Bu addımlar mərhələli şəkildə, zaman-zaman atılmalıdır”.

Qeyd edək ki, mütəxəssislər belə yanaşmanın düzgün planlaşdırıldığı təqdirdə həm tıxacların azalmasına, həm də ictimai nəqliyyatın daha cəlbedici olmasına töhfə verəcəyini bildirirlər.