Dairəvi yolun tam bağlanması ciddi narazılığa səbəb olub - 50 qəpik?

Bakı dairəvi avtomobil yolu tam bağlanıb. Adıçəkilən yolda təmir işləri bir necə gün öncə başlayıb.  APA TV-nin xəbərinə görə, təmir işləri başlayanda yolda hərəkət qismən məhdudlaşdırılsa da, sonradan gediş hissə tam bağlanıb. Yolun təmir olunmasından xəbərsiz olan sürücülər yolun yarısından geri qayıtmalı olurlar.

 Sürücülərin çoxu bildirdilər ki, yolun bağlanmasından sonra "Sədərək" ticarət mərkəzinin daxili yolundan istifadə edir, bu zaman hər dəfə 50 qəpik ödəniş edirlər. Mövcud vəziyyət isə haqlı narazılığa səbəb olub. "Yolları bağlayıblar. 50 qəpik alıb içəri buraxırlar. Bu harada görünüb? Harada var belə bir şey?"

Sürücü deyir ki, yol nişanlarının olmaması səbəbindən hər gün yol qəzası baş verir. Çəkiliş apardığımız zaman özünü “Sədərək” ticarət mərkəzinin əməkdaşı kimi təqdim edən şəxslər öncə çəkiliş aparmağa icazə vermədilər. Daha sonra avtomobilə yaxınlaşaraq nalayiq sözlər işlədərək avtomobilin qarşısını kəsdilər.

Mövcud vəziyyətə münasibət bildirən Nəqliyyat Nazirliyi "Azəryolservis" ASC-nin mətbuat xidmətinin rəhbəri Pünhan Mürsəliyev deyib ki, təmir işləri başlayanda yolda hərəkət qismən məhdudlaşdırılıb. Lakin sonradan bəzi sürücülərin səriştəsizliyi həmin ərazidə qəzaların yaranmasına gətirib çıxartdığı üçün həmin yolda gediş hissəsi tam bağlanıb. Onun sözlərinə görə, sürücülər dairəvi qovşaqla düz hərəkət etməklə Lökbatan-Xocasən yoluna çıxa və Astara-Qazax istiqamətində yollarına davam edə bilərlər. Bu zaman “Sədərək” ticarət mərkəzinin yoluna keçməyə ehtiyac qalmayacaq. Pünhan Mürsəliyev deyib ki, hələlik Bakı Dairəvi Yolunun nə zaman açılacağı bəlli deyil.