Dələduzlar yenidən iş başında: Pulsuz "BakıKart" adı ilə pulları ələ keçirirlər - FOTO

Dələduzluqla məşğul olan şəxslər insanların pulunu mənimsəmək üçün növbəti yola əl atıblar. Avtosfer.az xəbər verir ki, Facebook sosial şəbəkəsində "Bakı ictimai nəqliyyat kartı" adlı saxta səhifə yaradılıb. Həmin səhifədə "BakıKart"ın pulsuz əldə olunması və il ərzində ödənişsiz ictimai nəqliyyatdan istifadə edilməsi ilə bağlı saxta təkliflər irəli sürülür. Bu təklifdən yararlanmaq istəyənlərə isə təqdim edilən linkə daxil olmaları tələb olunur.

Qeyd edək ki, həmin linkə daxil olduqdan sonra şəxsi məlumatların yazılması tələb olunur. Bundan sonra kart hesablarında olan vəsaitlər dələduzlar tərəfindən mənimsənilir. Həmin dələduzlar yaratdıqları müxtəlif saxta profillərlə sözügedən paylaşımın rəy bölməsində kartı əldə etdiklərini və bundan məmnun olduqlarını yazaraq insanları inandırmağa çalışırlar.

Belə məlumatlara inanmamağı və şəxsi məlumatları heç yerdə paylaşmamağı tövsiyə edirik.

Könül Rauf