Əks yola çıxaraq təhlükə saçan sürücü CƏZALANDIRILDI - FOTO + VİDEO

Bir müddət əvvəl izləyicilərimizdən biri, Göyçayda avtomobillə yüksək sürətlə hərəkət edərək digər hərəkət iştirakçılarına təhlükə yaradan sürücü ilə bağlı Avtosfer.az-ın elektron poçtuna görüntülər göndərmişdi. Biz də məsələni işıqlandırmışdıq. Artıq sözügedən şəxs barəsində hüquqi tədbir görülüb.

Qeyd edək ki, təhlükə saçan sürücü ilə bağlı Daxili İşlər Nazirliyinin Baş Dövlət Yol Polisi İdarəsinin Hərəkətin Təhlükəsizliyinin Təbliği və İctimai Qurumlarla Əlaqə Şöbəsinin rəisi polkovnik-leytenant Rövşən Tağıyev Oxu.az-a bildirib ki, sözügedən görüntülər araşdırılıb:

"Hyundai" markalı, 77-CN-567 dövlət qeydiyyat nişanlı avtomobilin sürücüsünün respublika əhəmiyyətli avtomobil yolunda təhlükəli manevr edərək digər hərəkət iştirakçılarının həyat və sağlamlığına ciddi təhdid yaratması ilə bağlı sosial şəbəkələrdə yayılan videogörüntü Baş DYP İdarəsində araşdırılıb. Sözügedən kobud qayda pozuntusunu törədən şəxsin Göyçay rayon sakini, Rafil Tarverdiyev olması müəyyən edilib. Araşdırma zamanı əməlindən peşman olduğunu bildirən R.Tarverdiyevlə profilaktik söhbətlər aparılıb və barəsində qanunamüvafiq inzibati tənbeh tədbiri tətbiq olunub".

Xatırladaq ki, iyunun 5-də Göyçay-Ağsu yolunda 77-CN-567 qeydiyyat nişanlı “Hyundaı” markalı avtomobilin sürücüsü qarşısındakı bir neçə nəqliyyat vasitəsini ötmək üçün əks yola çıxıb. Bu zaman yüksək sürətlə hərəkət edən maşın qarşıdan gələn avtomobil üçün təhlükə yaradıb. Manevr qaydalarını pozan sürücü İnzibati Xətalar Məcəlləsinin müvafiq bəndinə əsasən cərimə oluna bilər.

Məsələ ilə bağlı Avtosfer.az-ın sorğusuna cavab olaraq DİN-in Mətbuat Xidmətinin Şəki regional qrupundan bildirilib ki, görüntülərlə bağlı araşdırma aparılır və qanunamüvafiq tədbirlərin görülməsi təmin olunacaq.

Məhəbbət Tərlanoğlu