Ermənilərin Tərtərdə yas mərasimini atəşə tutması daha bir qatı hərbi cinayətdir - Politoloq

Erməni hərbi birləşmələrinin Tərtərdə dəfn mərasimində iştirak edən mülki əhalini atəşə tutması bu ölkənin terrorçu və cinayətkar mahiyyətini bir daha ortaya qoyur.

Avtosfer.az xəbər verir ki, bunu Trend-ə politoloq Şəbnəm Həsənova deyib.

Politoloq vurğulayıb ki, Rusiya tərəfinin təşəbbüsü əsasında 9-10 oktyabr tarixlərində Moskvada keçirilən görüş nəticəsində Azərbaycan, Rusiya və Ermənistan Xarici İşlər nazirlərinin birgə bəyanatı və bu əsasda Azərbaycan və Ermənistan arasında humanitar məqsədlər üçün atəşkəs razılaşmasına baxmayaraq, Ermənistanın silahlı qüvvələri beynəlxalq hüququn norma və prinsiplərini, 1949-cu il Cenevrə Konvensilarını və onun əlavə protokollarını, Birləşmiş Millətlər Təşkilatı Təhlükəsizlik Şurasının qərar və qətnamələrini yenidən açıq şəkildə pozur".

Ş.Həsənova vurğulayıb ki, bu, bir daha göstərir ki, cinayətkar Ermənistan hakimiyyəti sülh istəmir, onların məqsədi işğalçılıq, Azərbaycan xalqına qarşı soyqırım siyasətini davam etdirməkdir.

Qeyd edək ki, dünyasını dəyişən Tərtər rayon sakini dəfn edilərkən Ermənistan silahlı qüvvələri mərasim iştirakçılarını ağır artilleriya atəşinə tutub. 3 nəfər hadisə yerində ölüb, 3 nəfər isə müxtəlif xəsarətlərlə xəstəxanaya yerləşdirilib.