Gürcüstanla sərhəddə yeni keçid məntəqəsi yaradılır

Gürcüstan Maliyyə Nazirliyinin Vergi Xidmətinin rəhbəri İrakli Beriya və Azərbaycanın Gürcüstandakı səfiri Faiq Quliyevlə görüşdə “İpək Yolu – İpək Yolu” adlı yeni birgə sərhəd-keçid məntəqəsinin tikintisinin vacibliyi vurğulanıb. Avtosfer.az "Yeni Sabah"a istinadla xəbər verir ki, bu barədə Gürcüstan Vergi Xidməti bəyanat yayıb.

İşçi görüş dekabrın 17-də baş tutub.

Yeni srhəd keçidlərində gömrük prosedurlarının sadələşdirilməsinə və narkotik vasitələrin qanunsuz dövriyyəsinə qarşı mübarizədə əməkdaşlığın daha da dərinləşdirilməsinə xüsusi diqqət yetirilib. Görüşdə həmçinin regionda tranzit potensialının inkişafı üçün vacib olacaq “İpək Yolu - İpək Yolu” yeni birgə sərhəd-keçid məntəqəsinin tikintisi müzakirə olunub. Görüşdə Vergilər Xidməti rəisinin birinci müavini Paata Kiladze, Gömrük İdarəsinin rəisi Mixeil Çokoşvili, beynəlxalq əlaqələr şöbəsinin müdiri Arçil Daraxvelidze, Azərbaycan səfirliyinin iqtisadiyyat katibi Samir Abdurəhimov və səfirliyin gömrük attaşesi Vüsal Əbilov iştirak ediblər.

Xatırladaq ki, son günlər Gürcüstanla sərhəd keçidində bir sıra problem yaranıb. Bundan əlavə, rəsmi Tbilisinin mövqeyi Azərbaycan mediasında tənqid olunub.