Hamı yatanda sahibkarların gecə fəaliyyəti başlayır – SƏKİ ZƏBTİ - FOTO

Paytaxtda səkilərin zəbt edilərək, eləcə də yaşıllıqların məhv edilərək hansısa obyektə çevrilməsinin dəfələrlə şahidi olmuşuq. 12 günlük bayram tətili zamanı şəhərin bir neçə rayonunda müxtəlif iaşə qəfil meydana çıxdı. Dövlət qurumlarının, icra hakimiyyətlərinin istirahətə getməyindən istifadə edən sahibkarlar hansısa üsullarla metrolara yaxın ərazilərdə öz köşklərini qurdu, obyektlərinin açılışını etdi.

Avtosfer.az xəbər verir ki, belə hadisələrdən bir neçəsi də Xətai rayonunda baş verib.

Belə ki, “Həzi Aslanov” metrostansiyası yaxınlığında sakinlər səhər yuxudan qalxanda artıq metro keçidinin qarşısında yeni bir obyekt görüblər. Dəmir konstruksiyalı obyekt bir neçə saatın içində səkidəcə quraşdırılıb.

Analoji hal “Əhmədli” metrostansiyası yaxınlığında Sarayevo küçəsində də yaşanıb. Belə ki, uzun müddət müzakirə olunan ərazidə artıq obyektin təməlini atacaq şəkildə dəmir konstruksiyalar düzülüb. Səki daşları artıq sökülüb və obyektin tikintisinə hazırlıq başlayıb.

Sakinlər aidiyyəti qurumlardan sahibkarların bu cür özbaşınaqlıqlarına son qoymasını xahiş edir.

Səfər