Hamilə qadın və əri ağır qəzaya düşüb

Kürdəmir rayonunda iki nəfərin ağır xəsarət alması ilə nəticələnən avtomobil qəzası baş verib. APA-nın məlumatına görə, hadisə bu gün saat 12:00 radələrində Bakı-Qazax yolunun 206-cı kilometrliyində, Kürdəmir şəhəri ərazisində qeydə alınıb. Kürdəmir rayon Qarabucaq kənd sakini, 1983-cü il təvəllüdlü Ələkbərov Cəlal Sərxoş oğlunun idarə etdiyi “VAZ 2106” markalı minik maşını qarşı tərəfdən gələn “Mercedes” markalı minik maşını ilə toqquşub. Hadisə nəticəsində sürücü Cəlal Ələkbərov və onun həyat yoldaşı 1989-cu il təvəllüdlü Ələkbərova Qumru Nəzər qızı müxtəlif dərəcəli bədən xəsarətləri ilə Kürdəmir Mərkəzi rayon Xəstəxanasına yerləşdirilib. Qadının hamilə olduğu bildirilir. Faktla bağlı Baş Dövlət Yol Polisi İdarəsinin istintaq və təhqiqat şöbəsi tərəfindən araşdırma aparılır.