“İcbarı sığortalar haqqında” qanun dəyişir

Bu gün Milli Məclisin İqtisadi siyasət, sənaye və sahibkarlıq komitəsinin növbəti iclası keçirilib. Avtosfer.az xəbər verir ki, komitə sədri Ziyad Səmədzadə bugünkü  iclasın  gündəliyinə  iki məsələnin təqdim olunduğunu deyib. O, “İstehsalatda bədbəxt hadisələr və peşə xəstəlikləri nəticəsində əmək qabiliyyətinin itirilməsi  hallarından  icbari siğorta haqqında” və “İcbarı sığortalar haqqında” qanun  layihələrində edilən dəyişikliklərin mahiyyəti barədə danışdı. Sonra müzakirəyə  təqdim olunmuş sənədlərlə bağlı məlumat verən Maliyyə Nazirliyinin Dövlət Sığorta Nəzarəti  Xidmətinin rəisi Namiq  Xəlilov bildirdi ki, hər iki sənəddə edilən dəyişikliklər ölkə prezidentinin  2011-ci il 15 sentyabr tarixli  500  nömrəli Fərmanına əsasən  sığorta sektorunda ödəniş sisteminin təkmilləşdirilməsi və nağdsız  dövriyyənin  artırılması  məqsədilə  hazırlanmışdır. 

Qeyd edildi ki, sığorta bazarı, xüsusilə icbari sığortada nağd dövriyyənin payı kifayət qədər yüksəkdir. Beynəlxalq təcrübədə bu problemin həllinin ən səmərəli yolu nağd dövriyyənin azaldılması və nağdsız ödənişlərə üstünlük verilməsindən keçir. 

İclasda icbari sığorta müqavilələrinin elektron qaydada bağlanılması təklifi  də irəli  sürüldü. Xidmət  rəisi qeyd  etdi ki, “İcbari sığortalar  haqqında”  qanunun İcbari sığorta  haqqında və İnformasiya sisteminin məlumatlarla təchiz edilməsi haqqında bölmələrinə yeni  hissələr  və maddələr  əlavə  edilib. Bunlar Standart  və  sərhəd  sığorta  müqavilələrinin bağlanmasına  və Avtonəqliyyat  vasitəsinə  dəyən  zərərlərin  tənzimlənməsi haqqında əlavə bəndlərdir. 

Komitə üzvləri Vahid  Əhmədov, Xanhüseyn Kazımlı, Rüfət  Quliyev, Tahir Mirkişili sənədlərə edilən dəyişiklikləri razılıqla  qarşıladılar, ölkənin sığorta sistemində baş verən  əsaslı dəyişikliklər barədə fikirlərini  bildirdilər.