İlham Əliyevdən Sarkisyanı şoka salan tələb

“Serj Sarkisyan 2010-cu ilin iyununda cəbhə bölgəsində minalanmış sahəni cəsarətlə keçərək düşməni onun öz silahı ilə ağır itkilərə məruz qoyan və qeyri-bərabər döyüşdə qəhrəmanlıqla həlak olan Mübariz İbrahimovun cəsədinin geri qaytarılması ətrafında Azərbaycanın apardığı təbliğata toxunub və azərbaycanlıları “Mübariz İbrahimovu qəhrəman kimi təqdim edərək ermənilərə göz dağı verməkdə” günahlandırıb”. Bunu Azərbaycan Respublikası Prezidenti Administrasiyası ictimai-siyasi məsələlər şöbəsinin müdiri Əli Həsənovun AzərTAc-a müsahibəsində bildirib. Ə.Həsənov deyib ki, Azərbaycan prezidenti İlham Əliyevin Serj Sarkisyana Mübariz İbrahimovun əsl qəhrəmanlıq nümunəsi göstərdiyini xatırladıb: “Prezident İlham Əliyev isə cavabında Serj Sarkisyana xatırladıb ki, müharibənin öz qanunları var. Mübariz İbrahimovu biz qəhrəman kimi qələmə verməmişik. O, təkbaşına erməni əsgərlərinin qoruduğu səngəri dağıdaraq, ondan artıq işğalçı əsgəri öldürüb, özü də həyatını qəhrəmancasına qurban verib. Müharibə qanunlarına görə, tərəflər qəhrəmanlara hörmətlə yanaşmalıdır. Mübariz İbrahimov əsl qəhrəmanlıq nümunəsi göstərib və haqlı olaraq da Milli Qəhrəman adını qazanıb”.

Ə.Həsənov əlavə edib: “Prezident İlham Əliyev Serj Sarkisyandan qəhrəmanlara məhz qəhrəman kimi yanaşmağı tələb edib”.