“Körpələr arasında kəskin virus yayılıb” – PEDİATRDAN XƏBƏRDARLIQ - FOTO

Son vaxtlar ölkədə azyaşlılar arasında müxtəlif virus infeksiyalarının yayılması müşahidə edilir.

Avtosfer.az xəbər verir ki, bu infeksiyalar arasında rotavirus və əlamətləri səpki, qızdırma, ishal olan “Koksaki” kimi xəstəliklər xüsusi diqqət çəkir. 

Mövzu ilə bağlı Pediatr Günay Rəsulova saytımıza açıqlamasında deyib ki, virus mənşəli qastroenteritlər, xüsusilə rotavirus infeksiyaları geniş yayılmağa başlayıb: “Bu xəstəlik əsasən qarın ağrısı, qusma və ishal kimi simptomlarla müşayiət olunur. Bağça və kollektiv mühitlərdə olan uşaqlar arasında daha çox rast gəlinir. Əsas əlamətlər arasında qızdırma, qusma, qarın ağrısı və sulu ishal (bəzən gündə 10 dəfəyə qədər) yer alır”.

Pediatr vurğulayıb ki, müalicə əsasən simptomatik aparılmalıdır:

“Bu qusma və ishal nəticəsində yaranan maye itkisini bərpa etməyə yönəldilir. Əgər uşağın qarın sancısı varsa digər cərrahi patologiyalar da nəzərə alınmalıdır, çünki bəzi viral və ya bakterial qastroenteritlər digər cərrahi problemlərlə qarışa bilər. Buna görə də dəqiq diaqnoz qoyulması üçün həkim müayinəsi, anamnez və klinik müşahidə vacibdir. Müalicə buna uyğun şəkildə tənzimlənməlidir”.
Fidan