Masazırda iki piyadanı vurub qaçan sürücü tutuldu

Abşeron polisi iki gün əvvəl piyadaları vurub qaçmış sürücünü saxlayıb. Hadisə Masazır qəsəbəsində baş verib. Avtosfer.az-ın APA TV-ya istinadən xəbərinə görə, naməlum avtomobil Toğrul Vəkil oğlu Novruzov və Asim Ataman oğlu Nağıyevi vurub.

Avtomobilin sürücüsü hadisə yerindən qaçsa da, onlara oradan keçən xanım sürücü kömək edib. Xəstəxanaya çatdırılan yaralıların həyatı xilas edilib. Hadisəni törədən şəxs isə tez bir zamanda Abşeron Rayon Polis İdarəsinin əməkdaşları tərəfindən saxlanılıb. Ona məxsus "Ford" markalı minik avtomobili də cərimə meydançasına yerləşdirilib. Saxlanılan 48 yaşlı Şəfayət Cahangir oğlu Məmmədəliyev istintaqa ifadəsində əməlini etiraf edib. İndiyədək başına belə hadisənin gəlmədiyini bildirən Şəfayət Məmmədəliyev qorxduğu üçün hadisə yerindən qaçdığını deyib: "Birdən-birə maşının qabağına çıxdılar. Maşını saxlaya bilmədim. Oğlan şüşəyə dəydi, sol tərəfə düşdü. Gördüm ki, sonra ayağa durdu. Bir az irəlidə dayandım. Sonra, lənət şeytana, necə oldusa getdim".

Faktla bağlı Abşeron Rayon Polis İdarəsində cinayət işi başlanılıb, araşdırmalar davam etdirilir.