Metronun üstündə satılan qarğıdalı hansı təhlükə yaradır? - FOTO

Paytaxtın Nəsimi rayonu 20 Yanvar metrosunun çıxışında bişmiş qarğıdalı satılır. Avtosfer.az xəbər verir ki, görüntülər sosial şəbəkələrdə yayılıb və istifadəçilərin narazılığına səbəb olub.

Belə ki, görüntüləri sosial şəbəkələrdə yayan şəxs bildirib ki, kiçik bir qəza zamanı həmin isti qazan metrodan çıxan adamların üzərinə aşa və insanların həyatına təhülükə yarada bilər.

“Bakı şəhərində səyyar (mövsümi) ticarət və xidmətlərin aparılması Qaydaları”na əsasən:

Səyyari (mövsümi) ticarət və xidmət zamanı qanunvericiliklə qadağan olunmuş malların satılması, xidmətlərin göstərilməsi, həmçinin aşağıdakı malların satılması və həmin fəaliyyətlə bağlı xidmətin göstərilməsi qadağandır:

- qiymətli və yarımqiymətli daşlardan, qiymətli metallardan hazırlanmış məmulatlar;

- ancaq elektrik şəbəkəsindən qidalanan mürəkkəb-texniki malların (radio, televizor malları, elektrik məişət cihazları və digər elektrik malları);

- səs gücləndirici cihazlardan istifadə etməklə audio kassetlərin satışı;

- ət və ət məhsulları;

- süd və süd məhsulları;

- balıq və quş, onlardan hazırlanmış məmulatlar;

-  çörək;

- tez xarab olan ərzaq məhsulları (onları saxlamaq üçün özü hərəkət edən avadanlıqlardan istifadə edilməsi istisna olmaqla);

- funksional göstəricilərini yoxlamaq üçün xüsusi şərait və vasitələr tələb olunan məhsullar;

- spirtli içkilər və tütün məmulatı.

Qanun layihəsi 2000-cu ildə qəbul edilməsinə baxmayaraq 2024-cü ildə belə hallarla rastlaşmaq vətəndaşların haqlı narazılığına səbəb olur. Aidiyyatı qurumlardan məsələni təcili nəzarətə götürmək və problemi həll etməsi gözlənilir.

Səfər Əlizadə