Narkotik istifadə edən iki sürücü həbs edildi; vəsiqələri yox imiş - FOTO

Paytaxtda sürücülük hüququ olmadan və narkotik vasitənin təsiri altında avtomobil idarə edən sürücülər həbs edilib

Bu barədə Bakı Şəhər Dövlət Yol Polisi İdarəsindən Avtosfer.az-a məlumat verilib. Məlumatda deyilir ki, paytaxt ərazisində sürücülük hüququ olmadan avtomobil idarə edən, yol hərəkəti qaydalarını kobud surətdə pozaraq bunu sosial şəbəkələrdə yayan, eləcə də nəqliyyat vasitəsini narkotik vasitənin təsiri altında idarə edən iki sürücü həbs edilib. 

Tədbirlərlə qeyd edilən əməlləri törədən “Toyota” markalı avtomobilin sürücüsü Abdulla Şəfiyev və “Azsamand” markalı nəqliyyat vasitəsinin sürücüsü Elşad Əhmədov müəyyən olunaraq saxlanılıblar.

Qeyd edək ki, sürücü A.Şəfiyev saxlanılan zaman polisin qanuni tələbinə əməl etməyərək  tabesizlik də göstərib.

Saxlanılan şəxslər barəsində İnzibati Xətalar Məcəlləsinin müvafiq maddələri ilə protokol tərtib edilərək baxılması üçün məhkəməyə göndərilib. Məhkəmənin qərarı ilə hər iki sürücü 20 sutka inzibati qaydada həbs edilib.

Səfər