“Nə skuter, nə də velosiped sürücüləri bulvar mühafizəçilərini sayırlar”

Dənizkənarı bulvar ərazisində skuterlərdən kütləvi istifadə paytaxt sakinlərinin haqlı narazılığına səbəb olur. Onlar bildirirlər ki, xüsusən də axşamlar gəzintiyə çıxanda skuterlər onlara mane olur, hətta həyatları üçün təhlükə yaradır.

Avtosfer.az-ın məlumatına görə, nəqliyyat üzrə ekspert Elməddin Muradlı deyib ki, Bakıda skuterlər üçün xüsusi bir zona yaradıldılıb. Belə ki, velosiped zolağından skuterlər də istifadə edə bilər.

Ekspertin sözlərinə görə, bulvar ərazisində skuterlərin sürülməsi yolverilməzdir:

“Orada skuterlər sürməyi qadağan edən lövhələr vurulub. Amma baxırıq ki, skuter sürücüləri nişanların üzünə baxa-baxa orda şütüyürlər. Bu da insanlar arasında narazılıq yaradır. Çünki onlara nəzarət edən yoxdur”.

E.Muradlı ərazidə xidmət aparan polis əməkdaşlarının bununla bağlı tədbir görə biləcəyini deyib:

“Sadəcə, bunun üçün onlara səlahiyyət verilməlidir. Bu elə də çətin bir şey deyil. Ən azından skuter sürücülərinə cərimə yazmasalar belə, onları ərazidən uzaqlaşdırmaq üçün səlahiyyət verilməlidir. Çünki polis ərazini mühafizə edirsə, təhlükəsizlik baxımından bunu həyata keçirə bilər. Ümid yalnız onlaradır. Çünki nə skuter, nə də velosiped sürücüləri bulvar mühafizəçilərini saymırlar”.

Ekspert skuter sürücülərinin əyləncə üçün bulvar ərazisini seçməsinin yolverilməz olduğunu bildirib:

“Onlar xüsusi zonada skuter sürsələr, daha yaxşı olar. Yox, əgər özlərini kiməsə göstərmək istəyirlərsə, bu, başqa məsələdir. Bunun da qarşısı mütləq alınmalıdır. Çünki bulvar insanların istirahət zonasıdır, orda yaşlı insanlar, uşaqlar gəzintiyə çıxır. Orda elə sürətlə hərəkət edirlər ki, qorxu yaranır. Dəfələrlə toqquşmalar olub, insanlar xəsarət alıb”.

E.Muradlı belə hadisələrin sayı çoxalmamış məsələyə müdaxilə etməyin vacib olduğunu bildirib:

“Bu, piyada gəzmək deyil. Skuter bir nəqliyyat vasitəsidir. Ona görə də skuterləri insanların sıx olduğu yerdə sürmək təhlükəlidir”.

(bakupost)