Nəsir Məmmədov geri çağrıldı - Korrupsiya faktları araşdırılacaq?

Nəsir Natiq oğlu Məmmədov Azərbaycanın İraqda fövqəladə və səlahiyyətli səfiri vəzifəsindən geri çağırılıb. Prezident İlham Əliyev Sərəncam imzalayıb.

Azərbaycanın İraqdakı səfirliyində ciddi qanun pozuntusu, korrupsiya halları müəyyən edildiyi iddia olunurdu.

Avtosfer.az Xalq.az-a istinadən xəbər verir ki, səfirlikdə hər il viza alverindən milyonlar vəsait mənimsənilirdi. Söhbət viza rüsumunun 20 dollar olduğu halda səfirliyin saxta “vasitəçi şirkət”in əli ilə vizanı 500 dollara satmasından gedir. İl ərzində təxminən 5 min viza verilir ki, bu da yekunda 2-3 milyon dollar aralığında mənimsəmə olduğunu göstərir.

Viza alveri ilə məşğul olan “vasitəçi şirkət”in Azərbaycan Xarici İşlər Nazirliyindəki (XİN) rəhbər şəxslərdən birinə məxsus turizm şirkətinin olduğu bildirilir.

Məlumat üçün bildirir ki, vəzifədən azad olunan Nəsir Məmmədov 2018-ci ilə qədər  Əmək və Əhalinin Sosial Müdafiəsi nazirinin  müavini  olmuş  Natiq Məmmədovun oğludur.

Qeyd edək ki, Nəsir Məmmədov  Milli Məclisin Ailə, qadın və uşaq məsələləri komitəsinin sədri Hicran Hüseynovanın kürəkənidir.