Orta Dəhliz ölkələrinin nəqliyyat nazirlərinin görüşü təklif edildi

Özbəkistan Prezidenti Şavkat Mirziyoyev Transxəzər Beynəlxalq Nəqliyyat Marşrutu (TBNM, Orta Dəhliz) boyunca yerləşən ölkələrin nəqliyyat nazirlərinin görüşünün təşkil edilməslini təklif edib.

Avtosfer.az-ın “Report”a  istinadən məlumatına görə, o, bunu "Mərkəzi Asiya - Avropa İttifaqı" sammitində çıxışı zamanı bildirib.

Ş. Mirziyoyev “Mərkəzi Asiya - Avropa İttifaqı” sammiti zamanı kritik mineral ehtiyatlar sahəsində əməkdaşlığın dərinləşdirilməsi və investisiyaların təşviqi ilə bağlı qərarların qəbul olunacağını bildirib.

“Özbəkistan strateji xammal yataqlarının kəşfiyyatı, istismarı və onların dərin emalı üçün yüksək texnologiyalı istehsalatların yaradılması sahəsində aparıcı Avropa şirkətləri ilə əməkdaşlıqda zəngin təcrübəyə malikdir. Biz bu istiqamətdə Avropa İttifaqı ilə qarşılıqlı faydalı əməkdaşlığın genişlənməsini tam dəstəkləyirik”, - deyə o vurğulayıb.

Prezidentin fikrincə, bu əməkdaşlığın genişlənməsinə əsas maneə – hazır məhsulların, o cümlədən sənaye və kənd təsərrüfatı mallarının Avropa bazarına çatdırılması üçün yetərincə səmərəli nəqliyyat dəhlizlərinin olmamasıdır.

"Xüsusilə, Orta Dəhlizin genişləndirilməsi və yüklənməsi üçün əlaqələndirilmiş tədbirlərin və biznes üçün əlverişli şərtlərin hazırlanması lazımdır. Əminəm ki, bu vəzifələr ümumavropalı "Qlobal Gateway" proqramının məqsədlərinə tam uyğundur. Bu baxımdan, razılaşdırılmış yanaşmaların hazırlanması üçün Avropa İttifaqının himayəsi altında bu marşrut ölkələrinin nəqliyyat nazirlərinin görüşünü təklif edirik", - o fikrini belə yekunlaşdırıb.