Qatarda güllələnmə: məşhur aktyor və daha 2 nəfər yaralandı - VİDEO - FOTO

Hollandiyanın paytaxtı Amisterdamdan Parisə səfər edən qatarda silahlı şəxs ətrafa atəş açıb.

Anspress-in məlumatına görə, silahlı hücüm nəticəsində 3 nəfər yaralanıb. Onlardan 2 nəfərinin vəziyyəti ağırdır. Hadisə ilə bağlı Fransa Dəmiryollarından açıqlama verilib.

Yaralananlar arasında "Leon" və "Klan Soprano" filmlərində çəkilmiş tanınmış aktyor Jan Yuq Anqkand var. İnsident zamanı həmçinin amerikalı və britaniyalı 2 keçmiş hərbçi də yaralanıb. Hadisənin hansı səbəbdən baş verdiyi hələlik məlum deyil. Amma atəş açan şəxsin terrorçu olduğu ehtimal edilir.

Qatarın Fransanın şimalında yerləşən Arras şəhəri yaxınlığından keçərkən baş verdiyi bildirilir. Ətrafa atəş açan şəxs dərhal polis tərəfindən həbs edilib. Polis onun üzərindən 300 patron və bıçaq aşkar edib. Qatarda atəş açan Mərakeş əsilli 26 yaşlı şəxs olub.

Fransanın daxili işlər naziri Bernard Cazeneuvenin hadisənin baş verdiyi Arras şəhərinə getdiyi bildirilir. Hadisə baş verən vaxt qatarda 550 sərnişin olub.