Sabah Şamaxının çökmə baş verən yolunda təmir işlərinə başlanılacaq - FOTO

Şamaxı-Qonaqkənd avtomobil yolunda çökmənin baş verdiyi əraziyə Azərbaycan Avtomobil Yolları Dövlət Agentliyinin (AAYDA) 19 saylı “Xüsusi Təyinatlı Yol İstismarı” MMC-nin əməkdaşları tərəfindən baxış keçirilib.

Avtosfer.az-ın məlumatına görə, idarənin baş mühəndisi Kənan Babaşov "Azərtac"a bildirib ki, son günlər torpaq sürüşməsinin aktivləşməsi sözügedən yol infrastrukturuna ziyan vurub.

“Buna baxmayaraq, Şamaxı-Qonaqkənd avtomobil yolunda gediş-gəliş dayanmayıb. Hazırda əlverişsiz hava şəraitinə görə ərazidə təmir işləri aparılmasa da, sözügedən ərazi lentlənib, müvafiq nişanlar qoyulub. Sabah səhər saatlarından yolda bərpa işlərinə başlanılacaq, əraziyə texnika və canlı qüvvə cəlb olunacaq”, - deyə baş mühəndis vurğulayıb.

Xatırladaq ki, torpaq sürüşməsi nəticəsində yolun bəzi yerləri dağılıb, asfalt örtüyündə çökmələr və iri çatlar əmələ gəlib.