“Şimal-Cənub” dəhlizinin şərq qolunun inkişafı üzrə Yol Xəritəsi imzalanıb

Bu gün Aktauda Qazaxıstan, İran, Türkmənistan və Rusiya arasında “Şimal-Cənub” beynəlxalq nəqliyyat dəhlizinin şərq marşrutunun potensialının 2024-2025-ci illər üçün sinxron inkişafı üzrə Yol Xəritəsi imzalanıb.

Bu barədə “Report” Qazaxıstan hökumətinin mətbuat xidmətinə istinadən xəbər verir.

İmzalanma mərasimi Qazaxıstan Nəqliyyat Nazirliyinin təşkilatçılığı ilə iyulun 19-dan etibarən birinci “Şimal-Cənub” nəqliyyat ticarət və ixrac forumunun keçirildiyi Aktau şəhərində baş tutub.

“Şimal-Cənub” nəqliyyat dəhlizi Fars körfəzinin limanlarında sonuncu məntəqə və Hindistana gələcək çıxış imkanı ilə geniş perspektivlər açır. Bu dəhliz marşrutun inkişafı üçün ölkəmizin iqtisadi inkişafının lokomotivlərindən birinə çevrilə bilər. Bu gün İran, Türkmənistan və Rusiya ilə “Şimal-Cənub” beynəlxalq nəqliyyat dəhlizinin şərq marşrutunun potensialının 2024-2025-ci illər üçün sinxron inkişafı üzrə Yol Xəritəsi imzalanıb”, - məlumatda deyilir.

Qeyd olunur ki, bu sənədin həyata keçirilməsi 2027-ci ilə qədər dəhlizin ötürmə qabiliyyətini ildə 15 milyon tona, 2030-cu ilə qədər isə 20 milyon tona çatdırmağa imkan verəcək.

Forumda 12 ölkədən (Azərbaycan, Ermənistan, Əfqanıstan, Rusiya, Belarus, Türkmənistan, BƏƏ, İran, İraq, Oman, Özbəkistan) 440-dan çox nümayəndə, İqtisadi Əməkdaşlıq Təşkilatı və Avrasiya İqtisadi Komissiyasının təmsilçiləri iştirak edirlər.