Taksi sürücüləri etiraz aksiyası keçirdi

Avropalı taksi sürücüləri əlbir olaraq kütləvi etiraz aksiyası keçirib. ANS-in məlumatına görə, şərti olaraq “İlbiz” əməliyyatı adlandırılan bu aksiyada taksi sürücüləri Paris, London, Madrid, Berlin və Romada süni tıxaclar yaradıb. Mərkəzi yollarda nəqliyyatın hərəkəti iflic olub. Parisdə taksi sürücüləri tıxacı daha da böyütmək məqsədilə “Orli” aeroportuna və “Orli-Val” dəmiryolu vağzalına yığılmağı qərara alıb. Digər şəhərlərdə də taksilər dəmiryolu stansiyalarına toplaşıb. “Über” onlayn şirkətinə və sifarişli taksi xidmətləri təklif edən digər qurumlara qarşı aksiya keçirən sürücülər iddia edir ki, yeni ədalətsiz rəqabət nəticəsində onların peşəsi risk altına düşüb. Söhbət turistlər üçün həftəlik, aylıq və ya sadəcə bir neçə günlük icarəyə verilən sürücülü maşınlardan gedir. Fransada artıq kifayət qədər inkişaf etmiş bu xidmət növü Vi-Ti-Es adlanır. Adi taksi sürücülərini hiddətə gətirən əsas məqamlardan biri, həmin şirkətlərə vergi güzəştlərinin olması və onların 24 saat xidmət göstərə bilməsidir.