Tramp müharibənin bitdiyini elan etdi

ABŞ Prezidenti Donald Tramp Vaşinqton və Tehran arasında uzun müddətdir davam edən gərginliyin sona çatmasına doğru mühüm irəliləyiş əldə olunduğunu bildirib. Onun sözlərinə görə, tərəflər arasında böyük kompromis əldə edilib və yekun saziş yaxın günlərdə Avropada imzalana bilər.

Avtosfer.az Sfera.az-a istinadən xəbər verir ki, ilkin razılaşma layihəsində atəşkəsin 60 gün uzadılması, Hörmüz boğazının beynəlxalq gəmiçilik üçün açılması, İranın zənginləşdirilmiş uran ehtiyatları ilə bağlı danışıqların davam etdirilməsi, bəzi ABŞ sanksiyalarının yumşaldılması və beynəlxalq monitorinq mexanizminin yaradılması nəzərdə tutulur. Tramp sazişin əsas şərtinin İranın nüvə silahı əldə etməməsi olduğunu vurğulayıb.

İran Xarici İşlər Nazirliyi sazişin imzalanacağı tarixlə bağlı məlumatları təsdiqləməyərək yekun qərarın hələ verilmədiyini açıqlayıb. Bununla belə Tehran danışıqlar mətninin böyük hissəsinin razılaşdırıldığını bildirib.

Məlumata görə, Qətərin vasitəçiliyi ilə aparılan danışıqlarda dondurulmuş İran aktivlərinin azad edilməsi, Hörmüz boğazının açıq saxlanılması və nüvə proqramı üzrə danışıqların çərçivəsi kimi məsələlərdə irəliləyiş əldə olunub. Yekun qərarın İranın ali rəhbərliyi tərəfindən veriləcəyi gözlənilir.

İsrail isə razılaşmaya ehtiyatla yanaşaraq İranın nüvə və raket proqramlarının daha ciddi məhdudlaşdırılmasını tələb edir.

Mümkün saziş xəbərləri dünya bazarlarına da təsir göstərib: fond indeksləri yüksəlib, neft qiymətləri isə ucuzlaşıb. Buna baxmayaraq, tərəflərin fərqli mövqeləri səbəbindən diqqətlər Tehranın yekun qərarına yönəlib.