Üç ölkə Rusiyadan yan keçən dəmir yolunun tikintisinə başladı

Çin, Qırğızıstan və Özbəkistan Rusiya Federasiyasından yan keçən dəmir yolunun tikintisinə başlayıb.

Avtosfer.az xəbər verir ki, bu barədə dekabrın 27-də Çin-Qırğızıstan-Özbəkistan dəmir yolunun tikintisinə başlanılması mərasimində Qırğızıstan Prezidenti Sadır Japarov danışıb.

Japarovun sözlərinə görə, yeni dəmir yolu təkcə strateji obyekt deyil, həm də birləşdirici halqa olacaq.

“Çin-Qırğızıstan-Özbəkistan yeni dəmir yolu dəhlizi Avrasiya qitəsinin cənub körpüsünün qoluna çevriləcək və Qərbi Asiya və Yaxın Şərq bazarlarına çıxış açacaq. Bu marşrut yüklərin Çindən Qırğızıstana və Mərkəzi Asiyaya, oradan isə Türkiyəyə və daha sonra Avropa İttifaqına çatdırılmasına imkan verəcək. Layihə regional əlaqələrin gücləndirilməsinə və nəqliyyat marşrutlarının şaxələndirilməsinə xidmət edəcək ki, bu da nəqliyyat tranzit qovşağı kimi regionun rəqabət qabiliyyətini artıracaq”, o deyib.

Sadır Japarov əlavə edib ki, dəmir yolu Qırğızıstanın iqtisadi artımını sürətləndirəcək və ölkənin Avrasiyada tranzit qovşağı kimi mövqeyini gücləndirəcək.