Vətən müharibəsi qazisinə niyə əlillik verilmir? - AÇIQLAMA

“Tovuz rayon sakini İbrahimov Elşən Məhəmməd oğlu ilə bağlı həm tibb müəssisəsi, həm də hərbi həkim komissiyası tərəfindən təqdim edilən sənədə əsasən qiymətləndirilmə aparılıb. Qiymətləndirilmə zamanı vətən müharibəsi iştirakçısının hazırkı vəziyyətinin əlillik təyinatına əsas vermədiyi müəyyən edilib və imtina qərarı verilib”.

Bu barədə Oxu.Az-ın sorğusuna cavab olaraq Dövlət Tibbi Sosial Ekspertiza və Reabilitasiya Agentliyinin İctimaiyyətlə Əlaqələr şöbəsinin müdiri Tural Qurbanov deyib.

O qeyd edib ki, əlilliyinin qiymətləndirilməsi ilk növbədə aidiyyəti qurumlar tərəfindən vətəndaşla bağlı müvafiq sənədlər - şəhadətnamə və göndəriş təqdim edildiyi halda həyata keçirilir:

“Bir daha bildiririk ki, əlillik təyinatı qanunvericiliklə tənzimlənir və təsdiq edilmiş normalara uyğun gəlmədiyi halda əlillik təyin edilmir”.

Qeyd edək ki, sosial şəbəkələrdə Vətən müharibəsi qazisi Elşən İbrahimova əlilliyin verilməməsi ilə bağlı görüntülər yayılıb.